బాధ్యులపై కఠిన చర్యలు తీసుకోవాలని పోలీసులకు విజ్ఞప్తి
పులివెందుల
స్థానిక సంస్థల ఎన్నికల నేపథ్యంలో వైఎస్సార్‌సీపీ నాయకులపై టీడీపీ నాయకులు దాడి చేసి గాయపరిచారని కడప పార్లమెంటు సభ్యుడు వైఎస్‌ అవినాష్‌రెడ్డి పోలీసులకు ఫిర్యాదు చేశారు. ఈ ఘటనకు బాధ్యులైన వారిపై చర్యలు తీసుకోవాలని కోరారు.
సోమవారం సాయంత్రం లింగాల మండలం ఇప్పట్ల గ్రామంలో ఎంపీటీసీ ఎన్నికలకు సంబంధించి వైఎస్సార్‌సీపీ అభ్యర్థులకు మద్దతుగా ఉన్న నాయకులు సూర్యనారాయణరెడ్డి, నిరంజన్‌రెడ్డిపై టీడీపీ నాయకులు ఓబుల్‌రెడ్డి, మనోహర్‌రెడ్డి దాడి చేసి గాయపరిచారని ఎంపీ ఆరోపించారు.
ఘటనకు సంబంధించిన వివరాలను బాధితులతో కలిసి పులివెందుల రూరల్‌ పోలీస్‌ స్టేషన్‌లో సీఐ శాంతిలాల్‌కు వివరించారు. దాడికి పాల్పడినట్లు ఆరోపణలు ఎదుర్కొంటున్న వారిపై విచారణ జరిపి, చట్టప్రకారం కఠిన చర్యలు తీసుకోవాలని ఫిర్యాదులో కోరారు.
జెడ్పీటీసీ, ఎంపీటీసీ ఎన్నికల నోటిఫికేషన్‌ విడుదలైన నేపథ్యంలో ఈ ఘటన చోటుచేసుకోవడం స్థానికంగా చర్చనీయాంశమైంది.